हा, ही आणि तो, ती...

डोईवरच्या भाराने
'तिची' मान वाकलेली...
नेकलेस नाही मिळाला
म्हणून 'ही' रूसलेली...

पाठीवरती ओझं वाहून
'त्याची' पाठ सोललेली...
अन् शर्टाची घडी मोडली
म्हणून 'ह्याने' तलवार काढलेली...

'त्याने' बेवडा म्हणून मार खाऊन
रात्र फुटपाथवर घालवलेली...
'ह्याने' मात्र status जपत
Drinks घेऊन गाडी चालवलेली...

अलिशान फ्लॅटमध्ये      
'ह्यांची' पार्टी रंगलेली...
कचरा उपसून पार्टीचा
'त्यांची' बोटं भंगलेली...

माय गेली म्हणून 'तिने'
कामाला दांडी मारलेली...
कामवाली आली नाही
म्हणून 'ही' कावलेली...

हक्काच्या रजेसाठी 'आम्ही'
युनियन joined केलेली...
'त्यांना' मात्र रविवारची
सुट्टीही नाकारलेली...

सुकृता पेठे